MAUAJI YA ASKARI 8 KIBITI TLS YATOA TAMKO

Chama Cha Mawakili (Tanganyika Law Society-TLS), kimepokea kwa mshtuko na masikitiko mkubwa taarifa za mauaji ya askari wetu wa jeshi polisi nane katika eneo la Jaribu Mpakani wilaya ya Kibiti. Vijana wetu hao wameuawa wakitekeleza majukumu yao ya kulitumikia taifa letu na kikundi cha watu wasioitakia mema nchi yetu na wakaamua kuchukua maisha yao kikatili na katika utaratibu wa ajabu ambao hauwezi kukubalika kwa maelezo ya aina yoyote ile.

Tunatoa salamu zetu za rambirambi kwa wananchi wa mkoa wa pwani na watanzania kwa ujumla, Mkuu wa Jeshi la Polisi, IGP Ernest Mangu, pia tunatoa pole kwa familia za wapendwa hawa , jamaa zao, marafiki na watumishi wenzao wa jeshi la polisi. Sisi kama Chama cha mawakili tunalaani vikali tukio hili la mauaji ya askari na matukio Mengine yanayoshabihiana na tukio hili la Kibiti.

Hata hivyo tunaiomba serikali kupitia jeshi la polisi na vyombo vingine vya dola kufanya uchunguzi wa kina juu ya mauaji haya yakiunganishwa na mlolongo wa matukio mengine mengi yanayotokea huko mkoani pwani na nchini kwa ujumla hasa yale yanayohusu mauaji ya raia wakiwemo viongozi wa vitongoji na serikali za kijiji, mauaji ya mara kwa mara ya askari na makamanda wetu ambayo yameonekana kukithiri katika kipindi cha takriban mwaka mmoja sasa pamoja na unyang'anyi wa silaha.

Chama cha mawakili kinaamini matukio kama haya yumkini ni matokeo ya matukio mengine ya mauaji, ujambazi, uporaji na au utekaji wa raia yaliyopata kutokea lakini vyombo vyetu vya dola vikaonekana kutokuchukua hatua madhubuti ya kuhakikisha wahalifu husika wanatiwa nguvuni na kupelekwa mahakamani. 

Wito wetu ni kuwaomba wananchi kutulia, kutoa ushirikiano kwa jeshi letu la polisi na vyombo vyote vinavyohusika na ulinzi na Amani wa nchi yetu, hasa katika kipindi kama hiki ambacho ulinzi na usalama wa raia unaingia katika majaribio ya hali ya juu, ndio kipindi cha kushikamana na kuhakikisha matendo ya namna hii yanakomeshwa mara moja.

Mwisho tunamwombea kijana wetu aliyejeruhiwa katika tukio hili apone haraka na arudi kwenye majukumu yake kama kawaida ya kujenga taifa, pia tunaungana na familia za marehemu, jeshi la polisi kuwaombea dua waliouwawa ili wakapumzike kwa Amani, na Mwenyezi Mungu Azilaze Roho zao Mahala Pema Peponi. AMINA           

              

Imetolewa na Rais wa Chama-Tundu A. Lissu